所謂「上有天堂，下有蘇杭」，杭州呢個城市自古以來都係中國境內一個著名城市，唔單止風光明媚，响歷史上一直都係經濟極為繁榮嘅地方。如果史友們玩過《大航海時代IV》，其中一名主角明朝海軍李華梅嘅故事就係响杭州開始。

事實上，歷史上嘅杭州係中國一個海上貿易大港，中外商人都會雲集呢個地方做生意，係古代海上絲綢之路一個重要港口。杭州之所以成為貿易大港，原因好多。好似唐宋時造船同航海技術已有高度發展，成為海路貿易一個好重要因素。另一方面，杭州有絲綢同茶葉呢兩種特產，成為海外貿易嘅重要商品。南宋時期，就以臨安（即杭州）為首都，人口超過百萬，係當時全球其中一個最繁華嘅地方。

「千里迢迢來杭州，半為西湖半為綢。」講到杭州，當然要講講絲綢。杭州絲綢產業發達，造就咗杭州貿易嘅興盛，加上兩宋時期陸上絲綢之路被戰爭阻斷，令朝廷對海外貿易極為重視同提倡，促進咗杭州絲綢沿著海上絲綢之路，北向朝鮮半島，東往日本，南及南洋諸國，西至中東阿拉伯，令絲綢通往全球，享譽世界。